Kênaya Taybet Înan: Ma fek têkoşînî ra veranêdanê 2025-12-16 10:38:39   Neslîhan Kardaş   ŞIRNEX - Kênaya Taybet Înan a ke demê qedexeyê vecîyayîşê teberî de qezaya Sîlopiya ya Şirnexî de ameye qetilkerdiş Halîme Akîn dîyar kerde ke “Pêwa pêro nê demî zî, ma hema zî piştê têkoşînê dayîka xo de yê. Ma fek têkoşîn ra veranêdê.”   Taybet Înan 19ê Kanûnê 2015ine de taxa Nuhî ya Sîlopiya de kuçeyê 58ine de, demê ke keyeyê cîranan ra peyser ameyîne, hetê leşkeran ra ameye qetilkerdiş. Cenazeya Taybet Înan 7 rojî û 7 şewî kuçe de mende. Birayê mirdeyê ci Yusuf Înan ke şinawit Taybet Înan ameya qetilkerdiş, waşt şêro aye bîyaro. Labelê Yusuf Înan zî kuçe de ame qetilkerdiş. Dima ra, mêrdeyê ci Halît Înan waşt şêro hetkarî bikero. Labelê o zî birîndar bi.   Taybet Înan Kurdistan de sey Dayîka Taybet nasnayîş. Kênaya Taybet Înan Halîme Akin ajansê ma rê qisey kerd.   ‘Agahîya birîndar bîya ma rê ameye’   Halîme Akîn, roja yewine ya ke Sîlopiya de qedexeyê vecîyayîşê teberî neql bî, qal kena û vana ke dayîka ci Taybet Înan keye de nê la dewe de bî. Halîme Akin dîyar kerd ke demo ke behsê qedexeyê vecîyayîşê teberî bîyo, dayîka ci waşta ke şêro keye û va: “Pêrodayîşî dest pêkerdbî. Dayîka mi va ‘Çi bêro do bêro sereyê feqîran, yê bînî do şêrê’. Keyeyê mi û keyeyê dayîk û babîyê mi zaf nêzdîyê yewbînan bî. Şer dimayê nîmeyê şewe dest pêkerd û heta serê sibayî dewam kerd. Heta nê demî zî, dayîka mi tutan ser o fikrîyayîne. Semedo ke a mi û tutanê mi ra tersayene, a serê sibayî ameye keyeyê ma. Şer her roje ke derbas bîne tewr xidar bîne. Roja çarine ya dimayê neqlkerdişê qedexeyê vecîyayîşê teberî de, birayê mi bi telefon agahî da ma ke dayîka mi kuçe de birîndar bîya û uca asê menda.”   ‘Mi tehemûl nêkerd’   Halîme Akin demo ke zana ke dayîka ci gule werda, waşt keye ra vecîyo şêro verê ci, labelê dî ke guleyî asmanan ra varenê. Halîme Akin dîyar kerd ke keyeyê dayîka ci û aye nêzdîyê yewbînan bî û wina qisey kerd: “Demo ke ma veng da, kesî cewab nêda ma. Nê semedî ra mi waşt dimayê nê şêrî keyeyê dayîka xo. Mi venga dayîka xo, babîyê xo, apê xo da, labelê mi cewab nêgirewt. Ez peyser ameya keye, labelê mi hîs kerd ke çîyêk dayîka mi ser o ameyo. Dima ra mêrdeyê mi rê telefon ame û vatî ke dayîka mi birîndar a. Mi tehemûl nêkerd û reyna keye ra vecîyaya. Guleyê ke ma ser o varayîne bêpeynî bî. Nê demî de vatişê dayîka mi ame vîrê mi ‘Eke çîyêk ame sereyê mi, xo meke tehluke. Tutê şima yê qijî est ê. Tena wayê û birayê xo yê qijî rê wayîr vecî, bes o.’”   ‘Ma do pişta têkoşînê dayîka xo de bê’   Halîme Akin dîyar kerd ke a şewî nêeşkaya bireso keyeyê dayîka xo, labelê sibayêk bîn bi hawayêko eşkaya bireso uca û wina va: “Demo ke ez resaya keye, xal û babîyê mi birîndar bî. Dayîka mi kuçe de derg bîye. Mi waşt şêrî verê ci, labelê semedê guleyan ez nêeşkayîne. Çend rey mi hewl da ke bi yew parçeyê qumaşêko sipî şêrî zere, labelê înan gulevaran kerdêne. Semedê gulevaranê giranî, babîyê mi nêverda ez şêrî. O tersayîne ke eke ez şêrî, ez zî sey dayîka xo bêrî qetilkerdiş. Mi tena waşt dayîka xo uca ra dûr bifînî. Labelê çi bikerî zî, mi nêeşkayîne aye bigîrî. Her reyo ke mi qumaşo sipî berz kerd, înan tim gule mi rê eştêne. Ma waşt qet nebo semedê apê mi ma çîyêk bikerê, labelê o zî bi giranî birîndar bi. Şan de apê mi zî şehîd bi. Dimayê şeş rojan zî dayîka ci hema kuçe de bî. Ma hema zî nêeşkayîne aye uca ra vecê. Hetêk ra ma bermayîne heto bînî ra zî ma nêzanayêne ma çi bikerê. Dejê ma zaf gird bî. Sey ke dinya ma ser o rijyabî. Pêwa pêro nê demî zî ma hema zî dimayê têkoşînp dayîka xo de yê.”   Halîme Akin qetî kerd ke dewaya ke înan akerda zî ameya padayîş û wina peynîya qiseykerdişê xo ard: “Ma dosya zî semedê Dadgeha Heqê Merdiman a Ewropa şirawit. Labelê red bîye. Ma do pişt têkoşînê dayîka mi de bimanê. Ma heta dilopê gunîya xo ya peyêne fek têkoşînî ra veranêdê.”