Ver bi 8ê Adare: Ma bi xoverdayîşî azad benê  

2026-03-02 10:52:24


	 

	Rozerîn Gultekîn

	 

	WAN - Cinî bi sloganê ‘Ma bi xoverdayîşî azad benê, cimatê demokratîkî mûnenê’ xebatanê 8ê Adare domnenê û wina vatî: “8ê Adare pîrozkerdişêk wêtayêr, venga têkoşîn, sozdayîş û vîrardişî yo. Ma bi xoverdayîşî azad benê, bi azadîye cimatê demokratîkî mûnenê.”

	 

	Cinî heme wareyî de startê çalakîya 8ê Adare Roja Cinîyan ya Dinya dayî. Cinî hemverê şîdet, qetilkerdiş, zext û pelçiqnayîşî bi xeta xurt ê têkoşînî ver bi 8ê Adare de şinê. Wan de zî cinî bi sloganê ‘ma bi xoverdayîşî azad benê cimatê demokratîkî mûnenê’ xoverdayîşî rêxistin kenê.

	 

	Cinî mîkrofonê ma ra qisey kerdî û semedê mîtîngê 8ê Adare venga cinîyan kerdî.

	 

	‘Ma hemverê zîhniyetê camêrdî de têkoşîn de yê’

	 

	Sereka Komeleya Cinîyan a Starî ya Wanê Şafak Erkmen Ozanli wina va: “Ez 8ê Adare cinîyê kurdan ê Rojawan de xo ver danê û heme cinîyê têkoşer ê dinya pîroz kena. Roje de 3 cinî yenê qetilkerdiş. Hemverê nê ganî têkoşînê xo pîl bikerê. Dewlete mergê cinîyan êdî meşrû kena. Gumanbar dewlete bixo ya. Bi pakêta hukmî ya 11ine dir gumanbarî zîndan ra ameyî veradayîş. Rojêke de 6 cinî ameyî qetilkerdiş. Ma do têkoşînê cinîyan tenya nê, heme cinîyan dir pîl bikerê. Ganî wareyî pirr bibê û heme cinî xo biresnê yewbînan. Dewlete bi vatişê ‘cinî keyeyê xo de roşê’ qetilkerdişê cinîyan meşrû kena. Ma hemverê nê de têkoşînê xo domnenê. Ganî hemverê zîhniyetê serdest ê camêrdî têkoşîn bikerê. Ma 8ê Adare de heme cinîyan pawenê wareyan û ma wayîrê şorişê Rojawanî vejîyê.”

	 

	‘Tarîxê cinîyan eynî wextî de tarîxê xoverdayîşî yo’

	 

	Aktîvîsta Têgêrayîşê Cinîyanê Azadan (TJA) Felek Babur da zanayîş ke bi sloganê ‘ma bi xoverdayîşî azad benê, cimatê demokratîkî mûnenê’ 8ê Adare rêxistin kenê û wina va: “Ma bi nê sloganî ruhê 8’ê Adare danê hîskerdiş. Tarîxê cinîyan tarîxê xoverdayîşî yo. Keye, kuçeyan, şer de, aştîye de: tu wext keda cinîyan nêameye vînayîş û çin ameya hesibnayîş. Cinî hemverê nê bêvengî nêmendê û têkoşîn domnayê. Ma ewro 8ê Adare pîroz kenê labelê ma tenya peyser nêanê xo vîr, ma eynî wextî de ameyox zî awan kenê. Ma cuyayîşê azad û têduştî pîya awan kenê.”

	 

	‘8ê Adare venga têkoşînî ya’

	 

	Felek Babur wina peynî ard: “Prosesê cimatê demokratîkî de ma ver bi 8ê Adare de şinê. No muhîm o. Cinî azad nêbê cimat zî azad nêbeno. Ewro her vengê berz beno siba do esasê dinyayêka demokratîkî bierzo. 8ê Adare pîrozkerdişêk wetayêr, venga têkoşîn, sozdayîş û vîrardişî yo. Ma bi xoverdayîşî azad benê, bi azadîye cimatê demokratîkî mûnenê.”