KJK’yî ra hamleya ‘Nika demê cinîyan o’

2026-03-02 13:24:49


	 

	MERKEZÊ XEBERAN- KJK’yî bi wesîleyê 8ê adare îzahat da û hamleya stratejîke ya “Nika Demê Cinîyan o” eşkera kerd.

	 

	KJK’yî bi munasebetê 8ê adare Roja Cinîyan eşkerayîye daye û dîyar kerd ke hamleyêka stratejîke ya neweyî dest pêkerdê.

	 

	Eşkerayîya KJK’yî wina ya:

	 

	“Serrgêra 27ê sibate de bi berpirsîyarîyêka girde eşkerayîya Rayber Apoyî rê wayîr vejîyenê û karê “hêzê pêşengîye” ke Rayber Apoyî cinîyan rê dayo, bi layiqî anê ca.

	 

	Adare hem seba têkoşînê azadîya cinîyan hem zî seba tarîxê xoverdayîşê şaran dewrêko sembolîk o. 8ê adare sembolê xoverdayîşê azadîya cinîyan o, Newroze zî adirê azadî yo ke nêpeysîyeno. Bi nê munasebetî şexsê şehîdanê 8ê adare û Newroze de heme şehîdê şoriş û demokrasîye bi hurmet û minnet anê vîrî.

	 

	52 serrî tarîxê têkoşînê xo de herêkatê cinîyan bi hamle û kampanyayanê stratejîkan hişmendîya azadîye kerde komelkî. Hîrê serrî yo ke hamleya “Jin Jiyan Azadî Reyde Ma Şinê Ver Bi Şorişa Cinîyan” tena Kurdîstan de ney Rojhelatê Mîyanênî û sewîyeya dinya de hişmendîya azadîya cinîyan girs kerde û bî xeta xoverdayîşêko cihankî. “Jin Jiyan Azadî” felsefaya teorîke de nêmend, bî şîarêko cihankî ke tena cinîyan ney camêrdan zî sey felsefe û hêvîya xelisîyayîşê xo waran ra vengê xo kerd berz. Nika bi 8ê adare na hamle temam bena û hamleya newîye ya “Nika Demê Cinîyan o” dest pêkena.

	 

	Temînkerdişê azadîya fîzîkî ya Rayber Apoyî, viraştişê şertanê ciwîyayîş û xebitîyayîşê azadî, caardişê heqê hêvîye û hewanayîşê astenganê vernîya sîyasetê demokratîkî û projeya komelê demokratîkî de, heme bingeyê hamle yê. Çareserkerdişê meseleya kurdan a 200 serre bingeyê Haştî û Komelê Demokratîkî ser o eynî wext de alternatîfê krîzê cihanî yê merdimîye zî xo reyde virazeno. Azadîya fîzîkî ya Rayber Apoyî na mana de bi pêşengîya cinîyan têkoşînê cihankî heq kena.

	 

	Sîstemanê modernîteya kapîtalîste bi felsefaya “cinîyan bikişê” û “kulturê tecawizî” bedenê cinîyan kerdî warê şerî. Hemverê sîyasetê şerî yê cinsîyetperestî de, dînperest û nîjadperestî, hemverê tacîz, tecawiz û qirkerdişan de seba komelkîkerdişê erjanê xopawitişî, demokrasîye, seypêyî û azadîye û destkewtiştê nasname û statuyê cinîyanê rêxistinkerdeyan, nika demê cinîyan o.

	 

	Rojava bi hêzê xopawitişî yê YPJ’yî, rêxistinkerdişê cinîyan, temsîlîyetê seypê û sîstemê hemserekîye bîyo zemînê şorişê cinîyan o jeopolîtîk. Hemverê tarîya DAÎŞ û HTŞ’yî de sey astareyêk berqeno. La hîna şorişê cinîyan statuyê xo nêgirewto û talûkeyî girs ê. Ganî YPJ tena sey hêzê xopawitişî yê Rojava ney sey hêzê xopawitişî yê heme cinîyan bibo wayîrê statuyî. “Nika demê pawitişê Rojava, pawitişê şorişê cinîyan û yê YPJyî yo. Bi şorişê cinîyan ê Rojava nika demê cinîyan o!”

	 

	Di sey serrî yo ke kurdî û Kurdîstan bi sîyasetê asîmîlasyon, qirkerdiş û komployê nêteweyî parçe bi parçe bîyî. Seba vîyartişê nê sîyasetan yewbîyayîşêko neteweyî û yewbîyayîşo neteweyî yê cinîyan hewce yo. KJK’yî venga heme cinîyanê kurdan da ke seba xurtkerdişê yewbîyayîşê neteweyî berpirsîyarîya tarîxîye bigîrê xo ser.

	 

	Ma venga heme cinîyan kenê ke bihêz beşdarê hamle bibê û proseso ke Rayber Apoyî dayo destpêkerdene bi serfirazîya xo tacdar bikerê. Eynî wext de ma vengdayîşê camêrdanê ke azadîye wazenê, bingeyê xeta azadîya cinîyan ser o beşdarê awankerdişê kesayetîya azade û cuyêka newîye bibê.

	 

	Ma 8ê adare Roja Cinîyanê Kedkaran ê Dinya yê heme cinîyanê ke waran ra têkoşînê azadîye kenê, pîroz kenê û şehîda girde Sema Yuce bi hurmet û minnet anê vîrî û bêrê ma 8ê adare ra heta 21ê adare bibê pirdêk û ruhê hamleya ‘Nika Demê Cinîyan o’ biresnê Newroze.”