Dayîkê Aştîye yê Semsûrî ra mesajê 8ê Adare 

2026-03-06 10:39:00


	 

	Gulîstan Gulmuş

	 

	SEMSÛR - Dayîkê Aştîye yê Semsûrî bi wesîleya 8ê Adare cinîyê tepişteyan rê silam şirawitî û waştişê aştî û azadîye zî kerdî. Dayîkê Aştîye wina vatî: “Ma do têkoşînê ‘Cinî cuyayîş azadî’ bidominê. Ma cinîyê tepişteyan, cinîyê serê koyan û heme cinîyan rê serkewtiş wazenê.”

	 

	Bajarê Kurdistan û Tirkîya de çarçeweya 8ê Adare Roja Cinîyan a Dinya de çalakî û bername dewam kenê. Hetêk ra qetilkerdişê cinîyan yeno şermezarkerdiş û protestokerdiş, heto bîn ra zî mesajê têkoşînê cinîyê rêxistinbîyaye yeno dayîş. Yew bajaro ke xebatê 8ê Adare ci de dewam kenê Semsûr ê. Dayîkê Aştîye yê Semsûrî bi wesîleya 8ê Adare Roja Cinîyan a Dinya cinîyê tepişteyan rê silam şirawitî û waştişê azadî û aştîye reyna kerdî.

	 

	‘Cinîyê tepişteyan rê silaman şirawena’

	 

	Zîne Tumen da zanayîş ke ganî aştî û azadî bêro caardiş û wina va: “Cinîyê tepişteyan rê silaman şirawena. Hêvîdar a ke aştî bêro caardiş. Ganî 8ê Adare de heme cinî destê yewbînan bigirê. Ma wazenê aştî bêro caardiş. Ma wazenê her çî baş bo. Bernameyê wina de ameyîşê têhet ê cinîyan ma kêfweş keno. Bêrê ma dest yewbînan ra vera nêdê. Ma wazenê piştîdayîş zêde bo. Ez heme kesî kena xo verike.”

	 

	‘Derdê ma aştî ya’

	 

	Hanim Ozturk zî mesajê 8ê Adare cinîyê tepişteyan rê şirawit û wina ard ziwan: “Ez heme kesî rê serkewtiş wazena. Hêvîdar a ke ma biresê serkewtişî. Ez her tim vajî cinî cuyayîş azadî. Ez cinîyê tepişteyan, cinîyê serê koyan, cinîyê dîasporayî rê serkewtiş wazena. Ma aştî û azadîye wazenê.”

	 

	‘Wa tu mêrde nêvajo ‘cinî namûsê ma yê’

	 

	Ayşe Yildiz bale ant ser muhîmîya xurtkerdişê piştîdayîşê cinîyan û wina dewam kerd: “Her tim zilm cinîyan rê yeno kerdiş. Ganî ma pîya mîyanê piştîdayîşî de bê. Ma piştîdayîşî de bê ma do xurt bibê. Ma cinî yê. Namûsê ma mêrdan ra nîno perskerdiş. Wa tu mêrde nêvajo ‘cinî namûsê ma yê’.”

	 

	‘Ma aştîye wazenê’

	 

	Elîf Guven waştişê aştî û azadîye ard ziwan û wina va: “Ma sey cinî aştîye wazenê. Ma xeylêk dej ant. Ma tutê xo vînî kerdî. Kezeba ma veşa. Nê semedî ra êdî bes o. Wa aştî bêro caardiş.”

	 

	‘Ma şer nê aştîye wazenê’

	 

	Hatîce Bagirci derheqê muhîmîya 8ê Adare de qisey kerd û wina ercnayîş kerd: “Ma aştîye wazenê. Ma şer nêwazenê. Ma xeylêk dej ant. Ma êdî nêwazenê dej biancê. Çîyê ma dî wa tutê ma nêvînê.”