‘Heta cinî azad nêbê azadîya cimatî zî mumkin nîya’

2026-03-12 09:15:01


	 

	STENBOL - Aktîvîsta TJA’yî Rahîme Kurkçu dîyar kerd ke “Jin, jiyan, azadî” yew sloganan ra zêde yo, felsefeya cuye ya ke zincîrê koletîyê 5 hezar serrî parçe kena ya. Rahîme Kurkçu wina va: “Heta cinî azad nêbo, cemat zî azad nêbeno.”

	 

	Rayberê Şarê Kurdî Abdullah Ocalanî çarçeweya prosesê ke serê serra 2025ine ra dest pêkerd ra heta nika mesajê ke da cinîyan, dorê prensîbê “Cinî azad nêbo, cemat azad nêbeno” de şekil girewt. Abdullah Ocalan dîyar kerd ke serkêşê prosesî cinî yê û va ke proses tena veradayîşê çekan nîyo, “peymana komelî” ya ke bingehê cinîbîyayîşî ser o ya û ganî cinî maseyanê aştîyê de sey hêzî cay bigîrê. Rayberê Şarê Kurdî serrgêra prosesî de eşkera kerd ke ganî prosesê bêpêrodayîşî ra şêro sewîyeya “awankerdişê pozîtîf” û no modelê newe zî meclîsan, komunanê cinîyan ra bi modelê komela demokratîk şeno bêro caardiş.

	 

	Aktîvîsta Têgêrayîşê Cinîyanê Azadan (TJA) Rahîme Kurkçu derheqê prosesê “aştî û komela demokratîk” de ercnayîş kerd.

	 

	Rahîme Kurkçu têkoşînê azadîya cinîyan ser o vindert û dîyar kerd ke têkoşînê cinîyan xoverdayîşê tarîxî yo û wina dewam kerd: “5 hezar serrî yo nasnameyê cinîyan ser o zordarîyê sosyolojîk yenê kerdiş û cinîyan hemverê nê de têkoşînê xo bêmabêne dewam kerdî û heta ewro ardî. Ma şopê nê zordarîyî rewşanê tewr pak ê komelî yê 10 hezar serrê verî de zî vînenê. Yanî cinîyan her prosesî de, her serdemî de têkoşîn kerdî û heta ewro ameyî. Her cayê dinya de ça beno wa bibo, rastîya ke cinî rî bi rî manenê yewna ya. Ewro şîdet û zordarîyê cinîyan ser o, qetilkerdişê cinîyan bi hemkarîya hişmendîya serdest beno. La nê zordarîyan vernîya rayîrê azadîya cinîyan nêgirewt.”

	 

	Felsefeya jin jiyan azadî

	 

	Rahîme Kurkçu eşkera kerd ke têkoşînê azadîya cinîyanê kurdî heme têgêrayîşanê cinîyanê dinya rê bîyo çimeyê îlhamî û wina dewam kerd: “Ma seserre peyêne ewnîyenê, cinîyanê kurdî bi xoverdayîşê xo herikbarîyê tarîxî vurnayî. Tarîx nuştê. Leyla Qasim ra heta Zekiye Alkan, Berîtanan ra heta Zîlan heme hevalê zîndanan nê raywanî de bawerîyêk pîl ame mûnayîş. Cinî hemverê sîsteman xo ver danê, têkoşîn kenê. ‘Jin, jiyan, azadî’ tena sloganêk nîyo; felsefeya cuye yo, sîstemê fikr û fehmî yo. ‘Jin, jiyan, azadî’ yew sloganan ra zêdeyêr, felsefeya cuye ya ke zincîrê koletîyê 5 hezar serrî parçe kena ya. Cinî azad nêbo, cemat zî azad nêbeno. Heta semedê cinîyan zemînêk azadîye nêvirazîyo, azadîya komelî zî nêşena bibo. Cinî her wareyê cuye de têkoşîn kenê. No têkoşîn emser 8ê adare de hîna xurt bî û do Newroze dir dewam bikero. Cinî wayîrê prosesî bivecê. No berpirsîyarîyê ma hemine yo. Ganî her kes wezîfeyê xo bîyaro ca.”