‘Qetilkerdişê cinîyan şexsî nîyo polîtîk o’ 2026-03-16 09:51:13 Evîn Çîftçî   RIHA - Fazîlet Taştan Arserîm dîyar kerd ke qetilkerdişê cinîyan şexsî nîyo, hedîseyê sîyasî yê ke heme cimatî eleqedar kenê yo û va: “Semedo ke cezaya bi tesîrî nînê dayîş, prosesê huqûqî bi tesîrî nînê domnayîş, qetilkerdişê cinîyan zêde benê.”   Dewayê qetilkerdişê cinîyan û hêrişanê cinsîyetî de gumanbaran rê cezaya bêtesîrî yenê dayîş, “rewşa baş”, “tahrikê bêheq” ra ceza yenê vistiş û no zî zemînê zêdebîyayîşê hedîseyan awan keno. Bi feshkerdişê peymana Stenbolî û nêcaardişê bi tesîrî yê qanûnê hûmara 6284ine, cinî mahkumê bêasayîşîye yenê kerdiş.   Îdarekara Komeleya Piştîdayîşê Cinîyanê Yaşamevî ya ke Rihayî de xebate domnena, avûkate Fazîlet Taştan Arserîm derheqê mesela de qisey kerd.   ‘Sebebê qetilkerdişê cinîyan polîtîkayê bêcezaverdayîşî yê’   Fazîlet Taştan Arserîm dîyar kerd ke sebebê qetilkerdişê cinîyan polîtîkayê bêcezaverdayîşî yê û wina dewam kerd: “Netîceya bêcezaverdayîşî, tahrikê bêheq, vistişê takdîrî de çi heyf qetilkerdişê cinîyan her şinê zêde benê. Gumanbarî nê praktîkan ra cesaret gênê û hîsê çimsûrî suc kenê.”   Praktîkê vistişê takdîrî   Fazîlet Taştan Arserîm bale ant dosyaya Pinar Sevîmî ya ke serranê vîyarteyî de ameybî qetilkerdiş û va: “Ma destpêkî ra dosya taqîb kenê û ma waşt ke tewrê dosyaye bibê. La no waştişê ma ame redkerdiş. Pêwa nê ma tewrê her roniştinan bî. Vernê de gumanbarî rê cezaya muebetê giranî ame birnayîş, dima ra vistişê takdîrî ra cezaya muebetî vistî û qerarê dewamkerdişê tepiştişî dayî. Rewşa gumanbarî yê roniştinan de, bi sebebanê ke verê sabiqeyê ci çin o yeno caardîş. Waştişê ma muebeto giranbî. La çi heyf cezaya muebetî birnayî.”   ‘Waştişê ma: Cezakerdişê gumanbaran o’   Fazîlet Taştan Arserîm va ke cînayetê cinîyan şexsî nîyê, hedîseyê sîyasî yê ke heme cimatî eleqedar kenê yê û va: “Ganî gumanbarî bêrê cezakerdiş. Ganî cezayê bi tesîrî hemverê sucê ke cinîyan, tutan û heqê cuye rê yenê kerdiş bêrê dayîş. Waştişê ma no yo ke gumanbarî bêrê cezakerdiş. Ez venga pîlkerdişê têkoşînî heme cinîyan rê kena. Ma do pîya piştîdayîşê xo û têkoşînê xo pîl bikerê.“