Dayîkê Aştîye: Newroze semedê ma xoîfadekerdiş a 

2026-03-19 11:15:09


	 

	Elfazî Toral

	 

	STENBOL - Endama Meclîsê Dayîkanê Aştîye ya Stenbolî Sultan Bozkurt derheqê Newroze de qisey kerd û va: “Newroze tena pîrozbayî nîya, hemverê polîtîkayê înkar û îmhayî xo îfadekerdişî ya. Na Newroze, Newroza wayîrvecîyayîşê azadî û nasnameye ya.”

	 

	Newroze şarê kurdî û Rojhelatê Mîyanênî rê sembolê xoverdayîşê komelî û vejîyayîşê neweyî û hemverê zordarî û tarîtîye serkewtişî ya. Newroza ke bi taybetî cinî bi cilê xo yê rengîn cepheyê verêne de ca gênê, qerardarîya şarê ke cuyêka bi rûmet û demokrasî de bêro kerdiş temsîl kena. Newroza emserî ya Stenbolî bi kelecanêk pîl yena pawitiş. Endama Meclîsê Dayîkanê Aştîye ya Stenbolî Sultan Bozkurt derheqê Newroze de qisey kerd û va ke pîrozbayîyê emserî prosesêk krîtîkî de yenê kerdiş.

	 

	‘Bi bedelê giranan ma ameyî nê rojan’

	 

	Sultan Bozkurt eşkera kerd ke tutîye ra tewrê Newroze bena û va: “Newroze şarê kurdî rê zaf muhîm a. Meseleyê bîyayîşî û çinbîyayîşî ya. Roja ke kurdî ameyî dinya heta nika bi zordarî, şîdet û zilmî dir rî bi rî mendê. Dewlete hêrîşê kurdan kena. La Newroze ma rê serkewtiş a, cuye ya, xelasî ya, nasname ya, name ya. Verê Newroze qedexe bî. Merdimî serê koyan de adir wey kerdêne. Roşanê Newroze kurdan rê zaf manayîn a. Semedê Newroze bedelê giranî ameyê dayîş. Netîceya bedelî û têkoşînê giran de ma ameyî nê rojan.”

	 

	‘Êdî dora dewlete ya’

	 

	Sultan Bozkurt bale ant prosesê aştî û çareserîya demokratîkî û va ke hema dewlete gamêka nêeşta û wina dewam kerd: “Ma do Newroze pîroz bikerê. La hema dewlete gamêke nêeşta. Tepişteyî nêameyî veradayîş. Kurdan çi lazim bî kerdî. Êdî dora dewlete ya. Ma nêzanê dewlete ma ra çi wazena. Ma wazenê Newroze bi tutanê xo dir vîyarê. Ma azadîya şarê xo wazenê.”

	 

	Cinîyê kurdî

	 

	Sultan Bozkurt bale ant têkoşînê cinîyanê kurdan û eşkera kerd ke Newroze cinîyanê kurdan rê muhîm a û wina dewam kerd: “Cinîyê kurdî wayîrê rolê serkêşî yê. Cinî çin bê cuye çin a. Bêcinîyan cuye nêşena biherikîyo. Cinî bi coşêk pîl bi rengê xo tewrê Newroze benê. Cinîyanê kurdan heme cinîyanê dinya rê serkêşî kenê. Rayber Apo herra merdeyî ma ser ra eşt. Birêz Ocalan 50 serrî yo têkoşîn keno. Baş o ke serekê ma est o, baş o ke serekê ma yo. Semedê şaran têkoşîn domna. Ma wazenê roja Newroze agahîyêk baş bêro. Ganî her kes verê xo bido meydanê Newroze.”