‘Zîndanan de binpaykerdişê heqan zêde bîyê’ 2026-04-27 09:39:17   Elfazî Toral   STENBOL - Avûkate Gulseren Yolerî derheqê binpaykerdişanê heqî yê zîndanan û rewşa nêweşanê tepişteyan de qisey kerd û va: “Nêçareserîya problemê zîndanan polîtîkayêke dewlete ya. Yanî tîya de polîtîkayêke bi zanayîş yena domnayîş. Bi nê polîtîka dir tepişteyî ver bi merdişî şinê û vernîya problemanê cidî yê weşîyeyî akeno.”   Zîndanan de binpaykerdişanê heqan her şinê giranêr benê. Problemî nînê çareserkerdiş û raporê binpaykerdişî de bêmabêne ‘polîtîkaya bi zanayîşî’ yena ziwan. Rojê vîyarte de şubeyê ÎHDyî yê Stenbolî, raporê binpaykerdişê heqî yê hîrê aşman yê zîndananê Marmarayî pare kerd. Rapor de hezar û 602 binpaykerdiş ameyî tespîtkerdiş. Dîyar bî ke 8 herêmê Marmarayî de, 14 zîndanan ra muracatî ameyê kerdiş. Sewbîna dîyar bî ke 3 zîndananê Marmarayî de, 2 înan ra zîndanê teberê Marmarayî ra bi pêroyî 5 tepişteyî dinyaya xo bedelnayê.   Avûkate Gulseren Yolerî derheqê tabloyê bîyayeye de qisey kerd.   Zîndanan de merdişê bigumanî   Gulseren Yolerî eşkera kerd ke zîndanan de binpaykerdişê heqî her şinê zêde benê û her wext hetê çareserîye de veng danê selahîyetdaran. Gulseren Yolerî wina dewam kerd: “Meseleya zîndanan de vernîgirewtişê binpaykerdişê heqî de berpirsîyarî kewena milê dewlete ser. Nê semedî ra ma her rey berpirsîyarîyê dewlete anê vîr. La bi taybetî merdişê zîndanan tabloyêk cidî yo. Cewabê ke wezaretê edaletî persan ser o dano hetê esasî yê nê tabloyî nîşan dano. Pêwa nê tedbîrêk nîno girewtiş. Ma şahidîya merdişê tepişteyanê ke ver bi merdişî şinê kenê.”   Tepişteyê nêweşî   Gulseren Yolerî bale ant tepişteyê nêweşan ser o zî û wina va: “Heqê dermankerdiş ê tepişteyê nêweşan yeno astengkerdiş. La eynî wextî de zordarîyê psîkolojîkî yenê kerdiş, praktîkê giran babeta vatişî yê. Raporê ma de demê nê çîyanê ke yenê ciwîyayîş yenê dîyayîş. Ma rapor de bi sernameyan binpaykerdişanê heqan mojnenê.”   Zîndanan de grevê vêşanîye   Gulseren Yolerî grevê vêşanîye yê zîndanan ser o zî vinderte û wina ard ziwan: “Nêçareserîya problemanê zîndanan sey polîtîkayêke dewlete vernîya ma de ya. Yanî tîya de polîtîkayêke bi zaneyî yena domnayîş. Tepişteyî ver bi merdişî şinê. Raporê ma yê hîrê aşmî yê çele, sibate û adare 2026ine de ma 1602 binpaykerdişê heqan tespît kerd. Ma demêk ke îşkence û praktîkê xerabî yenê ciwîyayîş vînenê. Pêwa nê yew noqteyê muhîmî yê zîndanan grevê vêşanîye yo. Zîndanê sey Tîpê Bîran de grevê vêşanîye dewam kenê. Ganî vernîya binpaykerdişanê heqan bêro girewtiş.“​​​​​​​​​​​​​​​​