STENBOL - Rojnamegere Nezahat Dogan va ke munaqeşeyê cimatê demokratîkî de, berpirsîyarîyê xurtkerdiş ê ziwanê aştîye yê çapemenîya azade vejîya vernî û va, no yew esasanê awankerdişî yê prosesî yê rojnamegerîya cinîyan o. Nezahat Dogan dîyar kerd ke ganî dest ziwanê cinsîyetperest û mîlîtarîstî yê çapemenîye ra bêro verdayîş û va: “No hetê zelalbîyayîşê prosesî de muhîm o. Ganî berê Îmralîye zî bêrê akerdiş. Yan zî proses do yew het bimano.”

 

Ziwanê şerî bi serran înkar, tecrîd, globalbîyayîş û nimitişê rastîye pîl kerd. Hemverê nê, rojnamegerîya aştîye hîna zafêr zelalbîyayîş û neqlkerdişê rastîye mecburî kena. Prosesê “aştî û cimatê demokratîk” dir ame dîyayîş ke întîqalkerdişê munaqeşeyê çareserîya demokratîkî yê semedê cimatî de, rolê çapemenîye zaf muhîm o.

 

Rojnamegere Nezahat Dogan derheqê rojnamegerîya aştîye de ajansê ma rê qisey kerd.

 

‘Hêvîya şaran a semedê azadîye xurt bî’

 

Nezahat Dogan bale ant rolê çapemenîya azadî yê prosesê aştî û cimatê demokratîkî de û wina va: “Bi vengdayîşê 27ê sibate dir wareyêk neweyê munaqeşeyan ame akerdiş. Ame dîyayîş ke sîstemê tekpartî, mîlîtarîst û yê ke cimatî çin kenê nêşenê xo bidomnê. Vera nê perspektîfê aştî û cimatê demokratîkî ame rojeve. No hêvîya şaran a azadîye zî xurt kerd.”

 

‘Eşnawitişê vengê cinîyan, deşîfrekerdişê problemanê wezîfeyê esasî yo’

 

Nezahat Dogan dewam kerd û wina va: “Vengdayîşê aştî û cimatê demokratîk tena çareserîya problemê kurdî nîyo, eynî wextî de çareserîya problemê cinîyan zî mojneno. Fikro ke bi serkêşîya cinîyan sîstemê komunal û demokratîk şeno bêro awankerdiş, hetêk muhîm ê nê vengdayîşî bî. Nê semedî ra ma rojnamegerê cinî wexto ke şinê kuçeyan semedê deşîfrekerdişê heme probleman, ma xo berpirsîyar vînenê. Eşnawitişê vengê cinîyan ke şîdet ameyo kerdiş, problemê yenê ciwîyayîş rojeve de verdayîş, viraştişê xeberan û taqîbkerdişê prosesanê huqûqî yew wezîfeyê esasî yê rojnamegerîya cinîyan o.”

 

‘Çapemenîya azade rastîyan vecena orte’

 

Nezahat Dogan bale ant ziwanê çapemenîya terefgire û wina va: “Ziwanê çapemenîye karakterêk cinsîyetperest, netewperest û nîjadperest hewêneno. Sucê giran ê sey şîdet, desteştiş û hêrişanê cinsîyetî sey ‘îstîsmar’ yenê dayîş. No nîşaneyê ewnîyayîşê serdestê mêrdan o. No ziwan her wext cinîyan cîya vîneno, erzneno planê peyêne, têkoşînê cinîyan sey tehdîd vîneno. Çapemenîya azade na nokte de rastîyan vecena orte. Bi taybetî prosesê dimayê 27ê sibate de rolê çapemenîya azade zaf muhîm bî. Pêwa nê ma nêşenê vajê ke ziwanêk aştîyeyê xurtî ameyo awankerdiş. Ganî kêmasîyê çapemenîya azade zî bêrê dîyayîş.”

 

‘Ganî ziwanê aştîye esas bêro girewtiş’

 

Nezahat Dogan zî bale ant ziwanê nefret, şer û globalî yê prosesê aştîye de û wina va: “Tîya de berpirsîyarîyê çapemenîye zaf muhîm o. Vengdayîşê 27ê sibate ser de yew serre vîyart. Mesajê xo de vano ganî ziwanê nefret û provokatîf bivurîyo. Nê semedî ra eke no ziwan dewam bikero proses do zehmet bibo. Ganî ziwanê aştîye bêro esasgirewtiş. Babetêke bîn ê muhîm. Ganî rojnamegerî bieşkê şêrê Îmrali û persê xo bipersê. Ganî cewabî zî bi hemkarîya kameran vengê ci cimatî rê bêro neqlkerdiş. Berê Îmraliyî anêbê, proses zî do yew het bimano.”