MÊRDÎN - Verfeka Platformê Têkoşînê Tîryakî yê Şiyar Be ya Mêrdînî avûkate Dîlan Koç va ke tîryakî vurîyayo problemêk komelî û zêdebîyayîşê şuxilnayîşê tîryakî polîtîkayê şerê taybet xoserî nîno girewtiş.

 

Kurdistan de polîtîkayê şerê taybetî yê ke ciwanan û cinîyan ser o yenê domnayîş roje bi roje netîceyê înan yenê dîyayîş û şuxilnayîşê tîryakî tena ciwanan nê, tutan zî hedef gêno. Goreyê dayeyê sazîyanê komela sivîlî serra 2025ine de emrê şuxilnayîşê tîryakî kewt binê emrê 12 serrî.

 

Verfeka Platformê Têkoşînê bi Tîryakî yê Şiyar Be ya Mêrdînî avûkate Dîlan Koç derheqê şuxilnayîşê tîryakî de qisey kerd.

 

‘Ma ameyî têhet û ma dest bi xebatan kerd’

Dîlan Koç va ke Platformê Şiyar Be bi ameyîşê têhet ê rêxistinê girseyî yê demokratîkî platform ame awankerdiş û va: “Armancê awankerdişê platformî no bî ke ma hemverê fihûş û tîryakî çîyêk bikerê. Nê sebeban ra ma dest bi xebatan kerd. Wexto ke platform newe awan bî ma sey rêxistinê girseyê demokratîk venga tewrbîyayîşê xebatî rêxistine rê kerd. Ma waşt ke her kes semedê ciwanan destê xo bikero binê kerra. Dima ra ma xebatanê xo temam kerd semedê deklerasyonê platformî ma eşkerayîyêk û rayîrşîyayîşêk pê ard. Ma armancê xo heme sazîyan rê va. Ma hewcedarîyê na xebate va.”

 

‘Emrê şuxilnayîşî kewt 8-9ine’

 

Dîlan Koç va ke wexto ke xebatanê xo domnenê hînî zêde herême ser o vindenê û va: “Tewr zaf ça de tîryak yeno şuxilnayîş, ma bale ancenê uca û ma hewl danê ke bi şarî dir bikewê têgêrayîş û hemverê tîryakî têkoşîn bikerê. Nê semedî ra ma qezayan de eşkerayî û rayîrşîyayîş pê ard. Ma çalakîyan pê ard. Mêrdîn de şuxilnayîşê tîryakî zêde yo. Emrê şuxilnayîşê tîryakî kewt 8-9ine. Nisêbîn de nê emrî de ma musayî di kênayî tîryakî şuxilnenê. Nê tutî semedê dermankerdişî nêweşxane de mendî.”

 

‘Sebebê ci polîtîkayê şerê taybetî yo’

 

Dîlan Koç eşkera kerd ke Mêrdîn û Kurdistan de şuxilnayîşê tîryakî zaf zêde yo û no tesaduf nîyo û va: “Verê zî bajar de fihûş û tîryak estbî la demê peyêne de no zaf zêde bîyo. Netîceya polîtîkayê şerê taybetî de zêde bîyo. Sebebê no yo ke ciwanan sîyasetî ra dûr bikerê. Ma sey platform prensîbê xo vet orte. Ma do xo rêxistin bikerê. Ma sey şarî ganî xo rêxistin bikerê. Ma do na mesela de taxan û kuçeyan de xebatan bidomnê. Tîryak dorê dibistanan de yeno rotiş. Nê hetî de dewlete têkoşînêk nêdomnena. Ma veng danê dewlete la ma hêvîya xo zî bi înan girê nêdanê. Ma hemverê nê têkoşînê xo domnenê. Cayê ke rêxistina şarî bibo tîryak zî do nêkewo yê wareyî.”