AMED - Şaredariya Bajarê Mezin a Amedê, rapora xebatên polîtîkayên jinan a sala 2025’an bi jinên rojnameger re parve kir û perspektîfa xwe ya li ser têkoşîna li dijî şidetê, bihêzbûna aborî û bajarên jinan veguhast.

 

Serokatiya Daîreya Xizmetên Jin û Malbatê ya Şaredariya Bajarê Mezin, bi jinên rojnameger re hat cem hev. Di hevdîtina ku li otêlekê li navçeya Peyasê pêk hat de; Hevşaredara Bajarê Mezin Serra Bucak, Hevberdevka Meclîsa DBB’ê Demet Ceylan, Hevseroka Bajar a Partiya DEM’ê Gulşen Ozer, Alîkara Sekreterê Giştî yê DBB’ê Zerin Turk, Seroka Daîreya Xizmetên Jin û Malbatê Ozden Gurbuz Sumer û gelek rojnameger amade bûn.

 

Hevşaredar Serra Bucak di vekirina bernameyê de diyar kir ku wan xwestiye di dawiya sala 2025’an de bi kedkarên çapemeniyê yên jin re werin cem hev û got: "Me xwest bi rojnamegerên ku polîtîka û xebatên me dikin rojev û rojeva jinê dikin rojeva bajêr re bicivin. Îro em dixwazin hem bi we re bin hem jî fikrên we bigirin."

 

Serra Bucak bal kişand ser girîngiya "Bajarên Jinan" û got: "Em dizanin ku Amed di mijara bajarê jinan de hêza motor a herî girîng e. Em dipirsin ka em dikarin van bajaran çawa ewletir û guncantir bikin. Ji ber vê yekê hewcedariya me bi hevkariya we heye."

 

DÎKASUM piştî 8 salan dîsa hat vekirin

 

Seroka Daîreyê Ozden Gurbuz Sumer rapora salane aşkere kir. Sumer bi bîr xist ku Navenda Lêkolîn û Serlêdana Pirsgirêkên Jinan a Amedê (DÎKASUM) ku di sala 2016’an de ji aliyê qeyûm ve hatibû girtin, di 29’ê Rêbendana 2025’an de ji nû ve hatiye vekirin.

 

Li gorî raporê di sala 2025’an de:

 

* 1.742 Serlêdan: Bi giştî serlêdana 1.742 jinan hatiye wergirtin.

 

* Ji van serlêdanan 420 jê piştgiriya psîkolojîk, 415 jê piştgiriya aborî-civakî, 311 jê daxwaza stargehê û 123 jê daxwaza piştgiriya hiqûqî ne.

 

* Di daxuyaniyên şidetê de; 230 jinan şideta psîkolojîk, 175 jinan şideta fîzîkî û 54 jinan jî şideta aborî ragihandine.

 

Xeta Alo Şidet û perwerdehî

 

Sumer diyar kir ku Xeta Alo Şidet di 17’ê Îlona 2025’an de dîsa hatiye aktîfkirin û di 3 mehên pêşîn de 51 bangewazî hatine kirin. Her wiha di sala 2025’an de 2 hezar û 483 jinan beşdarî perwerdehiyên li ser wekheviya zayendî, tenduristî, parastina cewherî û mafên hiqûqî bûne.

 

Hêza aborî û jinên şofêr

 

Ji bo bihêzbûna aborî ya jinan gelek atolye hatin vekirin. Di çarçoveya projeya Şofêrên Otobusan ên Jin de, di sala 2025’an de 11 jin di nav Şaredariya Bajarê Mezin de hatin îstihdamkirin. Bi giştî 2 hezar û 481 jinan beşdarî atolyeyên pîşeyî (wekî tekstîl, kuaforî, lêkirina mobîlyayan) bûne.

 

17 hezar jinan ji JINKART’ê sûd wergirtin

 

Di raporê de cih hat dayîn ku di sala 2025’an de 50 hezar û 519 jinan serî li JINKART’ê daye û heta niha kart gihîştine destê 10 hezar jinan. Bi giştî 17 hezar jin ji JINKART’ê sûdê werdigirin. Bi vê sepanê mehê 1.800 TL û salê 21.600 TL piştgiriya aborî tê dayîn.

 

Sumer axaftina xwe bi van gotinan qedand: "Ev bajar bi ezmûna jinan diguhere; bi gotina jinan vediguhere."