WAN - Li navçeya Erdîşa Wanê ku di deh hezaran kes beşdarî pîrozbahiya Newrozê ya li qeraxa Gola Wanê bûn, peyama "Jiyana azad, dê bi Rêbertiya azad bê" dan. 

 

Li navçeya Erdîşê ya Wanê, bi deh hezaran kes ji bo pîrozbahiya ku bi dirûşmeyên "Newroza Azadî û Yekîtiya Demokratîk" û "Newroza Azadî û Demokrasiyê" hat lidarxistin, li qeraxa Gola Wanê li Fener Alayiyê kom bûn. Bi hezaran kesan, pankartên "Jiyana azad, dê bi Rêbertiyeke azad bê" hilgirtin, li ber muzîkê govend gerandin. 

 

Li herêmê ku reng û dirûşmeyên ku yekîtiya neteweyî temsîl dikin serdest bûn, pankartên ji bo piştgiriya Kurdên Rojhilatê jî hatin hilgirtin. Di pîrozbahiyê de ku bi rêzgirtinê dest pê kir, dirûşmeyên "Bijî Serok Apo" hatin berzkirin. Rozerîn Canpolat li ser navê Komîteya Amadekar axivî û Salih Muslim bi bîr anî û got: "Tekane rêya serkeftinê xebat û rêxistin e. Bijî Serok Apo." Piştî vê yekê, hevserokên DEM Partiyê yên navçeyê û hevşaredarên şaredariyê jî axivîn. 

  

Hevserokê DEM Partiyê yê Wanê Veysî Dîlekçî got: "Kurd 50 sal in têkoşîneke bênavber dimeşînin. Di 27'ê Sibatê de, Rêberê Gelê Kurd Abdullah Ocalan 'Pêvajoya Aştî û Civaka Demokratîk' da destpêkirin. Du sal in em di ronahiya vê manîfestoyê de Cejna Newrozê pîroz dikin û banga Rêber Ocalan diparêzin. Îsal, gelê Kurd hîn bêtir bi vê bangê ve girêdayî ye û ji bo qonaxa duyemîn a pêvajoyê çi hewce be dê bike. Lê di berdêla wê de, divê dewlet azadiya fizîkî ya birêz Ocalan misoger bike û şert û mercên ku serbest bixebite peyda bike. Niha li Îranê şer heye. Ji bo ku ev şer bi dawî bibe û gel mafên xwe bi dest bixe, divê paradîgmaya birêz Ocalan were bicîhanîn. Ger ev were bicîhanîn, ev şer dê bi dawî bibe û aştî dê li seranserê cîhanê belav bibe."

 

Piştre Endama Meclisa DEM Partiyê Gulderen Varli axivî û got: "Em gav bi gav ber bi azadiyê ve dimeşin. Em ji bo avakirina yekîtîya neteweyî dimeşin. Newroz ronahiya rastiyê ye ku li dijî zilm û tarîtiyê tê vêxistin. Navê Newrozê paradîgma û çareseriya birêz Ocalan e. Em ê gund bi gund, tax bi tax bigerin û paradîgmaya birêz Ocalan rave bikin heta ku ew şikl bigire. Me têkoşînên mezin da, da ku aştiyê bînin vê axê. Em ê aştiyê bînin. Ez ji bo jiyaneke azad û wekhev Newroza we pîroz dikim."

 

Parlamenterê DEM Partiyê Mahmut Dundar jî got: "Rêya birêz Ocalan rêya me ye. Di 27'ê Sibatê de, Rêberê Gelê Kurd birêz Abdullah Ocalan pêvajoyek da destpêkirin. Divê hikûmet niha gavekê bavêje. Divê azadiya fizîkî ya Abdullah Ocalan tavilê were misogerkirin. Em ê li her çar perçeyên Kurdistanê aştiyê bi dest bixin. Paradîgmaya me rêya me ye û em ê di vê rêyê de berdewam bikin." Mahmût Dundar her wiha banga beşdarbûna pîrozbahiya Cejna Nevroza Wanê kir.

 

Piştî axaftinan, Dayikên Aştiyê agirê Newrozê vêxistin. Piştre, hunermend Kasim Taşdogan derket ser dikê.