Rozerîn Gultekîn

 

WAN - Endama Komîsyonê Koçberî û Îltîcayî yê Baroyê Wanî avûkate Ceylan Ukay da zanayîş ke multecî vernîya her çî GGMyan û her cayê cuya de probleman dir rî bi rî yenê û wina qal kerd: “Dîyayîşê zereyê GGMyan hetê wezaretî ra yeno astengkerdiş. Nê semedî ra ma bi qasê ke yeno neqlkerdiş qalê probleman kenê. Cinîyê multecî problemê xo nêeşkenê qal bikerê.”

 

Şer û pêrodayîşî benê sebebê koçberîya bi mîlyonan merdiman. Nê prosesî de yê tewr zêde mexdûr benê cinî û tut ê. Cinî rayîrê koçberîye de her tewirê şîdet û desteştişî dir rî bi rî yenê. Vernîya her çî Merkezê Açarnayîşê Îdareyî yê Koçberîye (GGM) û her cayê cuye de probleman ciwîyenê. Endama Komîsyonê Koçberî û Multecîyan ê Baroyê Wanî avûkate Ceylan Ukay derheqê babete de qisey kerd.

 

‘Kapasîte zaf derbas bîya’

 

Ceylan Ukay da zanayîş ke semedo ke Wan bajarê sînorî yo, sey cayê transferê multecîyan yeno şuxulnayene û va: “Xeylê Afgan û Îranî yenê Wan. Multecîyî dimayê ke Îran ra yenê Wan vera ke bikewê bin qeydî hetê leşkeran ra yenê sînorkerdiş. Sînor de kewenê destê çeteyan û îşkence înan rê yeno kerdiş. Ma derheqê kapasîteya Merkezê Îdareyî de wayîrê agahîyêke zelal nîyê. Labelê goreyê agahîyanê destê ma de yê 800î ra zêdeyêr merdimî mîyanê merkezî de est ê. Kapasîteya merkezî zî binê na hûmare de ya. 6 aşmî qerarê taqîbkerdişê îdareyî yeno girewtiş û dimayê nê eşkenê 6 aşmê bînî zî bêro dergkerdiş. Hemverê qeraranê sînorkerdişî de, eke 7 rojan de prosesê huqûqî nêro destpêkerdiş, kar û barê sînorkerdişî yenê destpêkerdiş.”

 

‘Hetê wezaretî ra yeno astengkerdiş’

 

Ceylan Ukay va, bi rayîrê îxbaran probleman ra agahdar benê û va: “Waştişê ma yê semedê başkerdişê rewşa multecîyan est ê. Merkezê açarnayîşî de awe germe problemêko gird a. Nêeşkenê keye û avûkatan dir pêvînayîş bikerê. Ma midûrê merkezî dir pêvînayîş kerd. Vatî hûmare kapasîte ser o ya û babeta awe germe de şaredarî û VASKÎ mesûl ê. Pêwa ma waşt zî semedo ke wezaret destur nêdano tu kes nêeşkeno bikewo zereyê merkezî.”

 

‘Cinî problemê xo nêvanê’

 

Ceylan Ukay bale ant ser rewşa multecîyanê cinîyan û va: “Cinîyê multecî nêeşkenê problemê xo vajê. Xeylê camêrdî tewrê muracat û pêvînayîşan benê. Cinî vengê xo nêkenê. Cinî nêzanê muracatê ça bikerê. Gelo ma çira multecîyanê camêrdan dir pêvînayîş kenê? Cinî semedê mêrdeyê xo yan zî rewşanê bînan veng nêvejenê yan zî firsend nêvînenê. Çarçeweya projeyê Yewîya Baroyanê Tirkîya de nokteya hetkarîya huqûqî de piştîdayîşê huqûqî yeno dayîş. Ganî Tirkîya na babete de mesûlîyet bigîro. Qanûnê Pawitişê Xerîbî û Mîyanneteweyî qîm nêkenê. Ganî sererastkerdişê qanûnî bêrê kerdiş. Ganî heqê cuye bêro pawitiş.”