Rozerîn Gultekîn

 

WAN – Hemverfeka EKO-Derî ya Wanî Perîhan Sogukbulak texrîbatê gola Wanî de yenê kerdiş ard ziwan û va semedê HES’an Gola Wanî 200 metre peyser şîya, berardişê şaredarî, otel, baragehê leşkerî, kulîya serokomarîye û fabrîqeyan herikênê golan.

 

Sere de Gola Wanî û xeylêk golê qijî yê bînî semedê nêgirewtişê tedbîran roj bi roje tehlukeyê çinbîyayîşî dir rî bi rî yenê. Rojanê vîyarte de Şaredarîya Bajarê Girdî ya Wanî û şaredarîya Rêya Armûşî, Tûşba û Artemêtî dimayê varayîşê vewre, vewra rayîrî ser û peyerayîran kombibîyayîşî pêwa çopî, metalê giran, berardişê bajarî kom kerdî û eştî Gola Wanî û Sixkî. No bîyo sebebê texrîbatê ekolojîk.

 

‘128 çimeyê awe ra tenya 38 heban ra awe yena’

 

Heto bîn zî xeylêk yewîneyê leşkerî û tesîsê pêroyî nêzdîyê qeraxê gole yê û nê semedî ra rayîr ver bi texrîbatan akeno. HES’î benê sebebê çinbîyayîşê ganeyan û her wina 128 çimeyê awe yê Gola Wanî wayîr kena tenya 38 heb herikyenê. Hemverfeka Komeleya Ekolojîya Wanî (WAN EKO-DER) Perîhan Sogukbulak derheqê lêşinîyê gola Wanî de qisey kerd.

 

‘Gola Erçekî de nêzdîyê 200 tewirê mîlçikan binê tehluke de yê’

 

Perîhan Sogukbulak dîyar kerd ke ekolojî parçeyêk muhîm ê cuyayîşî yo û bêekolojî cuyayîş mumkin nîyo. Perîhan Sogukbulak wina ard ziwan: “Ma ekolojî nepawê ma nêeşkenê cuyayîşê xo zî bipawê. Bajarê Serhadî de texrîbatêk ekolojîk ê pîlî est o. Cayê baragehê leşkerî est ê xoza yena texrîbkerdiş, darî yenê birnayîş. Gola Erçekî de nêzdîyê 200 tewirê mîlçikan çinbîyayîşî dir rî bi rî yê. Pêwa nê Maseyê Încî Kefalî yê Gola Wanî zî binê tehluke de yê.”

 

Wan de golî binê texrîbatêk senîn de yê?

 

Perîhan Sogukbulak wina dergî da: “Semedê berardişê herikyenê gole ganeyê gole de çin benê. Otelê ke dora golî de yê, baragehê leşkerî û semedê şaredarî sîstemê sizgicî baş nêkenê, berardişî Gola Erçek, Sixkê û Wanî lêşin kenê. Nêweşxaneyê dewlete yê Gevaşê semedê sîstemêk sizgickerdişê baş çin o, xoza lêşin keno. Fabrîqeya çîmentoyî ya Artemêtê hewa lêşin kena. Semedê sîstemê sizgickerdişê şaredariya Tetwan û Xelatî baş nîyê, heme berardişî kewenê gole. Berardişê kanalîzasyonê qezaya Rêya Armûşî û Tuşbayî herikyeno cayêk û dima ra bi kamyonan benê sergoyê verî yê rayîrê Erdîşî ser. Nê semedî ra xoza zirarêk pîl vînena. Şar nê çî ra nêrazî yo. Berardişê kulîya Serekkomarîye ya Xelatê ameya viraştiş zî herikêna gole.”

 

Perîhan Sogukbulak wina peynî ard: “Ganî hetê ekolojî de şar bibo wayîrê hişmendî. Hetê hişmendîyê cimatî de qelsî est ê. Dimayê aşma Remezanî ma do partîyanê sîyasî dir, rêxistinê cimatê sivîlî, şar û ekolojîstan dir pêvînayîşan bikerê. Gola Wanî 200 metre peyser şîya. Semedê HES’an awe ziwa bena. Awe çin bo cuyayîş çin o. Na polîtîka bi zanebîyayîş Kurdistan de yena domnayene. Ma xoza dir pê nêkerê, aştî zî mumkin nîya. Darî yenê birnayîş. Ma serra vîyarte 250 hezar daranê mazêran ramitî û hedefê ma emser ramitişê mîlyonêk mazêran o.”