MERKEZÊ XEBERAN - KCK: Ganî waştişêko muhîm yê nê 8ê Adare zî azadkerdişê Rayber Apoyî bo. Azadîya Rayber Apoyî têkoşînê azadîye yê cinîyan têna Rojhelatê Mîyanênî de nê, do heme dinya de xurter bikero.

 

Hemserekîya Konseya Rayberdişî ya KCK’yî  bi wesîleya 8ê Adare Roja Cinîyan ê Dinya eşkerayîya nuştekîye daye. KCK’yî roja cinîyan pîroz kerd û cinîyanê ke semedê 8ê Adare kede daye, ardî vîrî.

 

Hemserekîya Konseya Rayberdişî ya KCK’yî wina va:“Heme sîstemê zextî bi zextê kiştoxê kastîkî ameyî destpêkerdene ke cinî kerde kole. Serdestîya camêrdan ê vera cinîyan despêkerdişê pêro xirabîyan o. Seba ke cinîyî dahîna zaf bêro eciqnayene zextê vera komelî ame xurtkerdene. Modernîteya kapîtalîste semedê çinhesibnayîşê cinîyan, merdimîye ard nuqtaya qedînayîşî. Cinîyan ke vera koletîye hemleya azadîye û demokrasîyî daye destpêkerdene bîyê hêzêko komelkî. Cinîyî roja ma de sey hêzêkê şorişgêrî yê globalî her roje têkoşîn kenê.

 

Rayber Apoyî serra 1998î de bi wertevetişê îdeolojîya xelisnayîşê cinîyan verê têkoşînê azadîye yê cinîyan akerd. Têkoşînê azadîye yê cinîyan demê kilmî de dinya ra vila bi. Têkoşînê cinîyan pê bingeyê xo yê îdeolojîk-teorîkî bi hêzêko xurt. Ewro hêzê azadîye yê cinîyan heme dinya de têkoşînê yewbîyayeyî rayra benê. Cinîyî bi na enerjîya şorişgêre do caardişê sozyalîzmê komelê demokratîkî de serkêşîye bikerê. Têkoşînê azadîye ê cinîyan sey hêzêkê şorişgêrî vera tarîtîye hêvî dano merdimîye. Tesîrê têkoşînê cinîyan serhildanê ‘Jin Jiyan Azadî’ û serewedaritişê mûntişê gijîkî de ame vînayene.

 

Heme dinya de şîdetê vera cinîyan zêdîyayo. Sîstemê camêrdê serdestî têkoşînê azadîye yê cinîyan ra terseno. Coka hêriş keno. Semedê qedînayîşê zextê serê cinîyan ganî vera sîstemî têkoşîn bêro xurtkerdene. Heta ke zextê serê cinîyan nêqedîyê, şerî zî nêqedîyenê. Kam ke şerî nêwezano ganî tewrê têkoşînê azadîye yê cinîyan bibo. Cinîyî tim vera şeran haştîye wazenê. Camêrdî zî koleyê sîstemê camêrdê serdestî yê. Camêrdî seba ke xo leymê xo ra pak bikerê û koletîye ra bixelisîyê ganî zîhnîyetê xo bibedilnê û tewrê têkoşînê cinîyan bibê.

 

Rayber Apoyî ke semedê têkoşînê azadîye yê cinîyan keda pîle daye prosesê Haştîye û Komelê Demokratîkî da despêkerdene ke hêzo xurt dano têkoşînê azadîye yê cinîyan. Bi haştîye û komelê demokratîkî yeno waştene ke Kurdîstan, Tirkîya û Rojhelatê Mîyanênî de cuya azade û demokratîke bêro afirnayene. Têkoşînê Haştîye û Komelê Demokratîkî cinîyan zî zaf eleqedar keno. Coka  cinîyî ganî  serkêşîya nê prosesî bikerê. Semedê averşîyayîşê prosesî ganî Rayber Apo şertanê azadan de bixebito. Cinîyî semedê azadîya Rayber Apoyî ganî serkêşîya têkoşînî bikerê.

 

Ganî waştişêko muhîm yê nê 8ê Adare zî azadkerdişê Rayber Apoyî bo. Azadîya Rayber Apoyî têkoşînê azadîye yê cinîyan têna Rojhelatê Mîyanênî de nê, do heme dinya de xurter bikero. Ma hêvî kenê ke 8ê Adare azadîya Rayber Apoyî dahîna nizdî bikero, 8ê Adare ya heme cinîyan pîroz kenê, têkoşînê cinîyan ke do heme merdimîye azad bikero, bi coşî selam kenê.”