AGIRÎ - Agirî de yewine "Newrozê Azadî û Demokrasî" Bazîd de ame tafistiş. Hemserekê DBPyî Keskîn Bayindir pîrozbayî de qisey kerd û diyar kerd ke kurdî wazenê Rayberê Şarê Kurdî Abdullah Ocalanî dir Newroze pîroz bikerê û va, "Nêzdîbîyayîşê Birêz Ocalanî dir nêzdîbîyayîşê ziwan û bîyayîşê kurdî yo. Nê semedî ra, azadîya Birêz Ocalanî azadîya şarê kurdî ya."

 

Newroza 2026î ya qezaya Bazîdî ya Agirîye bi sloganê “Newroza Azadîye û Yewîya Demokratîke” bi coşêko gird dest pêkerd. Bi hezaran cinî û ciwanî bi kincanê xo yê neteweyîyan herikîyayê meydanê Newroze yê Taxa Îshakpaşayî. Dimayê qiseykerdişan sloganî ameyê vatene, govende ameye girewtene û Azad Bedran û hunermendanê herême sehne girewt.

 

Programî de verê ci parlamenterê Agirî Heval Bozdagî qisey kerd û waşt ke na Newroze biba sebebê azadîye û aştî. Dima ra parlamenter Necla Demîr silam da şarî û vat ke ê bi kincanê xo yê neteweyîyan û ziwanê xo tîya de yê û Newroza şarî pîroz kerd. Parlamenter Sirrî Sakikî zî Newroza şarê kurdî pîroz kerd.

 

‘Kurdî ver bi azadîya şinê’

 

Keskîn Bayindirî bale ant muhîmîya Newroze ser o û vat ke Newroze bi serran o seba şarê kurdî bîya hêvîya yewîye û azadîye û vat: “Newroze vera Dehaqan bîya sembolê xoverdayîşî. Nika zî no sembol destê ciwananê kurd de yo. Newroze têkoşînê Rahşan û Mazluman a û nika no têkoşîn bi Rayberîya Birêz Ocalanî bi manîfestoyê azadîye. Na Newroze geşbîyayîş a û Rojava ra heta Rojhelatî kurdî lingan ser o yê. Kurd êdî resenê azadîya xo.”

 

‘Azadîya Birêz Ocalanî azadîya şarê kurdî ya’

 

Keskîn Bayindirî dîyar kerd ke Rojava de şerêko gird est o, her kes behsê kurdan keno û vat: “Kurdî do nê rejîmî birijnê û nêbêno serê şimşêrê tu hêzî. Newroze seba şarê ma yê Rojhelatî pîroz bo. Ma wazenê êdî Rayber Abdullah Ocalan reyde Newroze pîroz bikerê. Bi têkoşîn û tifaqî ma êdî nêzdîyê serkewtişî yê. Êdî kurdî aktorê gird ê û bi hêz ê herême de û şarê kurdî tena statu û azadîya xo wazeno. Nêzdîbîyayîişê hemverê Birêz Ocalanî nêzdîbîyayîşê hemverê ziwan, statu û estbîyayîşê kurdan o. Azadîya Birêz Ocalanî zî azadîya kurdan a. Hêvî û waştişê Ehmedê Xanî yewîye bî û nika ma ver bi yewîye şonê. Êdî kurdî têhet ê û seba azadîya xo têkoşîn danê. Na yewîye do ma bixelesna.”

 

Qiseykerdişan ra pey adirê Newroze ame wekerdene. Şar; bi slogan û girewtişê govende Newroze geş keno.