Melek Avci

 

ANQARA - Parlamentera DEM Partîyî ya Îzmîrî Burcugul Çubuk va ke îqtîdar derheqê prosesî de gamanê somutî nêerzeno, sey ke her çî temam o nîşan dano û proses tesîrê meydanî ser o nêkeno.

 

Pêwa ke prosesê Aştî û Cimatê Demokratîk ser o demêk derg vîyart zî hema îqtîdar tu gamêke nêeşta, ziwanê negatîf û nêzelal dewam keno. Vera ke prosesêk huqûqî bibo, raporê meclîsî zî nêdano verê xo.

 

Parlamentera Partîya Têduştî û Demokrasîyê Şaran (DEM Partî) ya Îzmîrî Burcugul Çubuk derheqê prosesî de qisey kerd.

 

‘Di helwestî est ê’

 

Burcugul Çubuk va ke îqtîdar proses demî de vila keno û no zî semedê nêeştişê gamanê derheqê zîndanî de vînenê. Burcugul Çubuk wina va: “Ez vatişanê verfekê îqtîdarî rexne kena. Sey ke yew çîyê ke dewlete kerdo rapor o. Vanê ma kerd qedîya. Yê dîyin zî sey ke rapor çin o têgêrenê. Di nêzdîbîyayîşî pê dir yenê domnayîş.”

 

‘No cigêrayîşê asayîşî tena semedê PKKyî nîyo’

 

Burcugul Çubuk dîyar kerd ke nika zî munaqeşeyê veradayîşê çekanê PKKyî de sînordar bîyî û wina va: “PKK xo fesh kerd. Koyan de gerîla bibê zî tewrê têkoşînê çekdarî nêbenê. Beno ke koyan de cuyêk bîn yena awankerdiş. La wazenê bêasayîş hêzê pawitişî bêro. Ganî no asayîş tena sey asayîşê huqûqî nêro qalkerdiş; cigêrayîşêk asayîşî ke bi demokrasîye binê temînatî bikewê est ê. No asayîş tena semedê înan nîyo, semedê her kesî yeno waştiş.”

 

‘Proses tesîrê meydanî ser o nêkeno’

 

Burcugul Çubuk dewam kerd û eşkera kerd ke ê bi xo zî zanê ke no rast nîyo û wina va: “La awankerdişê rewşa fehmî est o. Dezenfomasyonêk pîl o bi xo keno. Sey ke problem çareser bîyo, la gerîla uca mendo mojneno. Sey ke tu çî çin o mojnenê. Zordarîyê zîndanan peynî nêbîyî, xespkerdişê heqê tepişteyan dewam keno. Hawirdorêk wina de ma vînenê ke demokrasî çin o. Ma vînenê ke no prosesê çareserîye tesîrê meydanî ser o nêkerd.”

 

‘Yewine çîyo ke kerdo awankerdişê komîsyonî yo’

 

Burcugul Çubuk wina dewam kerd: “PKK çekan veşna. Çalakîyêk cidî pê ard. Nê ser de yew serre vîyart. Na serre de yew çîyo ke ame kerdiş awankerdişê komîsyonî bî. Nê komîsyonî de bi giranî baskê AKP-MHPyî ca girewtî. O wext zî ma vatî, raydayîşê ‘erê’ yê hevalanê ma derheqê îradeyê çareserîye bî. Rapor esasî de zaf problemdar o la bi hînî hetan raporêk o ke eşkeno rayîr akero. Ma qalê îqtîdarêk kenê ke no kerd. La hemserekê ma yew reye şîyî Îmraliyî. Yê ke wareyê aştîye, heqê merdiman, demokrasî de xebate domnenê hema nêşîyî Îmraliyî. Yew rojnamegerêk nêşîyo Îmrali. Hewcedarîya ma bi aştîye est a. Şer û mîlîtarîzm heme cografyayî de vila bîyo. Hemverê şerî, semedê aştîye têkoşîn yeno dayîş. La çîyê ke îqtîdar keno problemî çareser nêkeno. Hemverê vatişê ‘Ma çîyê lazim bî kerd’ çin o, şîdet vila beno.“​​​​​​​​​​​​​​​​