Jiyan Gencan

 

QAMIŞLO - Verfeka YRJyî Emel Mihemed serrgêra 128ine ya Roja Rojnamegerîya Kurdî de qisey kerd û ard ziwan ke rojnamegeran ser o hêrişêk xidar est o la rojnamegerê kurdî wazenê bibê vengê şarê xo û va: “Ganî tewr zaf rojnamegerî yewîya şarê kurdî biwazê.”

 

Rojnameyê kurdî yê verêne bi nameyê Kurdistan, 22ê nîsana 1898ine de hetê Mîqdat Mîthad Bedirxanî ra surgun de Paytextê Misirê Qahîreyî de dest bi weşanî kerd. Rojnameyo ke 31 hûmare ame çapkerdiş, 5 hûmarê ci Qahîre de ameyî weşankerdiş û yê bînî zî semedê zordarî û zextê Osmaniyan welatê cîyayan de ameyî çapkerdiş. Yew armancê muhîm ê rojnameyî no bi ke ziwanê kurdî aver şêro û dewlemend bibo. Bi wesîleya destpêkê rojnamegerîya kurdî ya Rojnameyê Kurdistanî, 22ê nîsanê sey Roja Rojnamegerîya Kurdî her serre 22ê nîsane de çar hetanê Kurdistanî de yena pîrozkerdiş.

 

Serrgêra verêna Rojnameyê Kurdî Kurdistanî ser o 128 serrî vîyart. Roja Rojnamegerîya Kurdî ser o verfeka YRJyî Emel Mihemed ajansê ma rê qisey kerd.

 

‘Rojava de a roje rojnamegerî yenê xelatkerdiş’

 

Emel Mihemed, Roja Rojnamegerîya Kurdî Rojava de senîn yena pîrozkerdîş û pêşwazîkerdiş ser o zî qisey kerd û wina va: “Rojavayê Kurdistanî de a roje sey adetêk tarîxî yena dîyayîş û yena pîrozkerdîş. Eynî wextî de Rojava de xelatkerdişî yê rojnamegeran zî yeno kerdiş. Mîyanê Şorişê Rojavayî de heme xoverdayîş, şer û têkoşînê şarê kurdî rojnamegeran bi belge mojnayî heme dinya. Rojavayê Kurdistanî de bi desine rojnamegerî mîyanê şerî de şehîd bîyî. Nê rojnamegeran, sanîye bi sanîye mîyanê şerî de xoverdayîşê şervanan taqîb kerdî û şehîd bîyî. Rojnamegerê ke semedê rastîye şehîd bîyî, ê bîyî vengê şarê xo.”

 

‘Rojava de YRJ û YRA ameyî awankerdiş’

 

Emel Mihemed hêrişanê rojnamegeran ser o zî ercna û wina ard ziwan: “Semedê pawitişê rojnamegeran Yewîya Neqlkerdişê Cinîyan (YRJ) û Yewîya Neqlkerdişê Azadî (YRA) ameyî awankerdiş. Rojavayê Kurdistanî de hêrişê zaf xidarî rojnamegeran ser o est ê. Zaf rojnamegerî demê taqîbkerdişê hedîseyan û demê şerî de şehîd bîyî. Rojava de rojnamegerî bi hawayêk azad nêeşkenê xebata xo bikerê çimkî yewser hêrîşî înan ser o pê yenê. La rojnamegerî bi hawayêk mertebî rastî û dejê şarê xo wazenê bi rayepêroyî dir pare bikerê.”

 

‘Hewcedarîya rojnamegeran bi yewîye est a’

 

Emel Mihemed ard ziwan ke hewcedarîya rojnamegeran bi yewîyêk xurt est a û wina ard ziwan: “Zaf rojnamegerî şehîd bîyî û astengîyan dir rî bi rî manenê. Nê semedî ra zî hewcedarîya ma rojnamegeran bi yewîyêk xurt est a. Ganî tewr zaf rojnamegerî hewl bidê yewîya şarê kurdî. Rojnamegerî Rojavayê Kurdistanî de bi mertebîyêk zaf pîl wazenê rastîya şarê xo, vengê şarê xo rayepêroyî rê biresnê.”

 

Emel Mihemed peynîya qiseykerdişê xo de Roja Rojnamegerîya Kurdî heme rojnamegeranê kurdan yê ke zerrîya înan semedê azadîye dana piro pîroz kerd û dîyar kerd ke ê do rêça rastîye de rayîr ra şêrê