ANQARA- DEM Partî bi eşkerayîyêka nuştekî roja Rojnamegerîya Kurdî pîroz kerd û vat: “Meşaleyo ke surgunîye de, mîyanê şert û mercanê zehmet de û binê tedayêk pîle de ame wekerdene, seba sazûmankerdişê cigêrayîşê heqîqetî bi gama yewine.”

 

DEM Partî derheqê 22yê Nîsane Roja Rojnamegerîya Kurdkî de eşkerayîyêka nuştekî pare kerd. Eşkerayî bi îmzaya Hetkarê Hemserekanê Pêroyîyan û Berpirsîyarê Komîsyonê Weşan, Çapemenî û Propagandayî yê DEM Partî ameye parekerdene.

 

Eşkerayî de wina ame vatene: “Tradîsyonê çapemenîya Kurdî 128 serrî ra ver 22yê Nîsana 1898î de bi Rojnameyê Kurdîstanî dest pêkerd ke hetê Mîqdat Mîdhed Bedîrxanî ra Qahîre de ame weşanayene û no tradîsyon ewro bîyo adresê mîras û xoverdayîşêko pîl. Roşnîyo ke surgunîye de mîyanê şertanê zehmetan de akewt seba sazûmankerdişê cigêrayîşê heqîqetî bîye gama yewine.

 

Rojnamegerîya Kurdkî temamê tarîxî de hemverê zulm, sansûr û qedexeyan estbîyayîşê xo domnayo û bedêlê giranî daya. Semedê qedexe û vernîgirewtene welatê xo ser o ney, la Qahîre ra heta Cenevreyî, London ra heta Îstanbûlî seba estbîyayîşê xo xo ver daya. Roja Rojnamegerîya Kurdkî serra 1973yî ra yo ke yena pîrozkerdene. Ê rayîrî ser ra ke Mîqdat Mîdhed Bedirxanî akerdo bi israr ray şina û azadîya çapemenî muhafaza kena.

 

Ewro hîna zî rojnamegerîye raştê tehdît û tadayan yena. Rojnamegerê ke semedê xeberanê xo yenê girewtene û qelemê înan yenê şikitene, verê Aştî û Komelê Demokratîkî de astengîyê tewr pîl ê. Bi nê wesîleyî ma reyna anê ziwan ke xebatê rojnamegerîye suc nîyê û ganî rojnamegerê ke hepsan de yê bêrê veradayîş.

 

Ma 22yê Nîsane Roja Rojnamegerîya Kurdkî de heme xebatkaranê çapemenîya azade silam kenê. Rojnamegerê Kurdî yê ke heqîqetî nusnenê hem bîyê şahidê tarîxê xoverdayîşî hem zî bîyê parçeyêk nê tarîxê xoverdayîşî. Nê semedî ra înan xeylê berdêlê giranî dayê. Ma şehîdanê rojnamegerîya azade bi rêzdarî yad kenê.

 

Serrgêra 128ine a Roja Rojnamegerîya Kurdkî de ma reyna anê ziwan ke ma do bibê vengê heqîqetî. Roja Rojnamegerîya Kurdkî taybetî awankerdoxê Rojnameyê Kurdistanî Mîqdat Mîdhed Bedirxan û heme xebatkaranê çapemenîya Kurdkî rê pîroz ba. Ma şexsê Musa Anter, Gurbetellî Ersoz, Nagîhan Akarsel, Cîhan Bîlgîn û Nazîm Daştan de heme şehîdanê çapemeniya azade bi rêzdarî yad kenê.”