STENBOL - Prof. Şebnem Korur Fîncanci va ke ganî rîameyîş, hesabdayîş û başkerdişê komelî pîya bêrê munaqeşekerdiş û va: “Edalet bi tena sereyê xo qîm nêkeno. Ganî bawerîyêka ke ancî çîyî nêyenê ciwîyayîş bêro viraştiş. Hewcedarîya modelê demokratîkî yê neweyî est a.”

 

Pêvînayîşanê çarçeweya “Prosesê Aştî û Cimatê Demokratîkî” de dewam kenê û hema îqtîdarî gamêke somutî nêeşta. Zordarîyê rayepêroyî ser, qerarê butlanê mutleq ê CHPyî ser û Paketa Edaletî ya 12ine ya ke heqanê bidestkerdeyanê cinîyan destê înan ra gêna. Proses û munaqeşeyê ke Tirkîya de dest pêkerdî dir, cinîyan konferansêk semedê îlankerdişî yê îradeyî û têkoşînê demokratîkbîyayîşî seserra dîyine ya komare de pê ard.

 

Sewbîna 13-14ê hezîrane de Stenbol de bi vengê zaf roşnvîr, nuştox, sîyasetmedar û hunermendî konferansê “Vurîyayîşê Demokratîkî yê Komara Seserra Dîyine” pê ame. Sîyasetmedar, rojnameger, rêxistinê komelê sivîlî, partîyê sîyasî tewrê konferansî bîyî û eleqeyêk pîl mojnayî. Konferans de tespîtkerdişê probleman, hemwelatîbîyayîşê têduştî, awankerdişê cuya hembeşî, rolê serkêşî yê cinîyan û bi nasnameyê bîyayîşî, munaqeşeyê rastî û rîameyîşî ameyî munaqeşekerdiş.

 

Yew kesanê ke tewrê konferansî bî moderatora roniştişê “Komelbîyayîşê demokrasî û aştîye”, avûkata heqan Prof. Şebnem Korur Fîncanci bî. Şebnem Korur Fîncanci derheqê rastî û rîameyîşê ameyoxî dir ercnayîş kerd.

 

‘Rastî bi tena sereyê xo qîm nêkena’

 

Şebnem Korur Fîncanci va ke semedo ke edalet pê bêro ganî hîn gamî bêrê eştiş û va: “Bêrastîye edalet mumkin nîyo. Semedê averşîyayîşê edaletî û rastî pê bêro ganî gamî bêrê eştiş. Wexto ke rastî bêro girewtiş ganî ma bizanê ke ma bi rastîye çi kenê, çimkî rastî bi tena sereyê xo qîm nêkena. Ma qalê rewşêke kenê ke dosyaya arşîvan de bimsno. Ma qalê muzeyêk vîrî nêkenê. Ganî hewldayîşêk başêrî bibo, naskerdişê rastîye û çîyanê ameyî ciwîyayîş bibo.”

 

‘Ganî cimat kerdox bêro dîyayîş’

 

Şebnem Korur Fîncanci eşkera kerd ke semedo ke başkerdişê komelî pê bêro hewcedarîya gaman est a û wina va: “Ganî heme travmayê ke ameyê ciwîyayîş bêrê zanayîş, merdimî bêrê başkerdiş; yê ke nê travmayî viraştî hesab bidê. Nê semedî ra hesabdayîş zaf muhîm o. Ma xeylê reyan heqîqet danê orte. Ma sey rêxistina heqê merdiman problemê xo yê rastîye dir anê ziwan. La dima ra ganî derheqê ke senîn rayîrêk ganî bêro domnayîş de cimat xo sey kerdox têbigêro. Problemê ma yê pîlî çi yê? Ganî bawerî bêro tesîskerdiş. Edalet bi tena sereyê xo qîm nêkeno. Ganî derûdorêk bawerîye bêro viraştiş. Ganî bêro vatiş ke ancî nê qetlîamî, binpaykerdiş nêrê ciwîyayîş.”

 

Ganî ciwanan ra dest pêbikero’

 

Şebnem Korur Fîncanci dîyar kerd ke rîameyîşê ameyoxî dir û rastî tena meseleyê îqtîdarî û dewlete nîya, meseleyêk komelî zî ya û wina dewam kerd: “Awankerdişê derûdorê ke çîyê ameyî ciwîyayîş tîya de bêrê parekerdiş muhîm o. No bi programanê pîlî nîyo, bi ameyîşê têhet ê dînamîkê herêmî mumkin o. Bi parekerdiş ê tecrubeyî mumkin o. Nê semedî ra konferans, kombîyayîşî muhîm ê. Ganî ma derûdorê ke ciwanî eşkenê qalê ameyoxî bikerê awan bikerê. Semedê vurîyayîşê demokratîkî hewcedarîya model û mekanîzmayê cîyayan est a. Ganî cigêrayîşanê modelê neweyî û sewbîna herêmî bikewê têgêrayîş. Hewcedarîya modelê neweyî est a.”