ŞEHBA - Jinên ciwan ên ku tevlî meşa li dijî êrîşên dewleta tirk bûn, bertekên xwe nîşan dan û gotin: "Berxwedan, hêz û têkoşîna me nîşana serkeftina me ye."   

 

Bi armanca şermezarkirina êrîşên dewleta tirk ên li ser herêmên Rojhilata Firatê, Yekîtiya Ciwanên Efrînê û Şehbayê daketin qadan û nerazîbûna xwe nîşan dan. Di nava meşê de jinên ciwan êrîşên dewleta tirk şermezar kirin û bertekên xwe nîşan dan.

 

'Em xwedî li civaka xwe derkevin'

 

Newroz Omer di derbara êrîşên dewleta tirk ên li ser Bakur û Rojhilatê Sûriyeyê de wiha got: "Em weke ciwanên Efrînê her tim di na va çalakiyan de  ne. Heta dilopek xwîn di canê me de heye em ê berxwedana xwe bidomînin. Ji ber ku bi berxwedanê em ê bigihêjin serkeftina xwe. Em ê xwedî li civaka xwe derkevin."

 

'Em tekoşîna xwe li hember dagirkeriyê mezin dikin'

 

Her wiha Hêva Heşêm hestên xwe li hember êrîşan anî ziman û got: "Em ciwan herikîne qadan û helwestên xwe li hember dagirkeriyê didin nîşan. Em êrîşên li ser Rojhilata Firatê û bêdengiya dewletan şermezar dikin. Em ê  ciwan bibin bersiv li hember dagirkeriyê û êrîşan." 

 

'Em ê xeta berxwedanê bidomînin'

 

Ciwana bi navê Stêrvan Miho bal kişand ser fikirê netewa demokratîk û wekheviya gelan û wiha got: "Îro li rojava wekheviya gelan heye. Her kes di nava hezkirinê de ye. Dewleta tirk îro dixwaze vê nexşeyê têk bibe û çeteyên xwe derbasî herêmê bike, em ê xeta berxwedana xwe bidomînin."

 

'Berxwedan jiyan e'

 

Raniye El-Wês yek ji ciwanên ku tevlî meşê bûne wiha nêrîna xwe ji me re parve kir: "Em ciwanên şoreşger tim biherikin qadan. Em teslîmî dewleta tirk nabin. Gelê Kurd ji teslîmiyetê mezintirin. Berxwedan jiyan e."