MÊRDÎN – Li Dêrikê, bi hezaran kes beşdarî pîrozbahiya Cejna Newrozê bûn û herêm veguherandin coşeke rengîn. Girseyê agirê Newrozê bi dirûşmeya "Bijî Serok Apo" pêxist.

 

Li navçeya Dêrikê ya Mêrdînê, pîrozbahiya Cejna Newrozê bi dirûşmeya "Azadî û Demokrasî / Newroza Azadî û Yekîtiya Demokratîk" hate lidarxistin. Bi hezaran kes kom bûn, welatî ji saetên sibehê ve gihîştin herêmê. Jinên ku cilên neteweyî yên herêma Qerejdax û navçeya Dêrikê li xwe kiribûn, herikîn qadê. 

 

Welatiyan, bi muzîkê re govend gerandin û dirûşmeyên wekî "Bijî Serok Apo" û "Yek e, yek e, yek e, Kurdistan yek e!" berz kirin. Li qadê, tevî hemû hewldanên astengkirinê, posterê Rêberê Gelê Kurd Abdullah Ocalan jî hate daliqandin. Li qada pîrozbahiya Cejna Newrozê, welatiyan di atmosfereke cejnê de cejna hev pîroz kirin, govend û dirûşme bê navber berdewam kirin. Ji bo bîranîna kesên ku di têkoşîna azadî û demokrasiyê de jiyana xwe ji dest dane, deqeyekê rêz hate girtin û dirûşmeya "Şehîd namirin" hate gotin. Salih Muslim jî hate bîranîn.

 

Piştî rêzgirtinê, hevserokên Navçeya Dêrikê ya DEM Partiyê,  Şîlan Çelîk û Ferhat Ozgen li ser navê Komîteya Amadekar ji welatiyan re axivîn, silav li wan kirin û Cejna Newrozê pîroz kirin. Welatiyan piştre bi stranên ku ji hêla hunermend Şeyhmus Temel û Dîren Temel ve hatin gotin, pîrozbahî berdewam kirin.

 

Piştre Parlamentera DEM Partiyê ya Mêrdînê Berîtan Guneş Altin mafê axaftinê girt û got ku Kurd bi rojan e li seranserê Tirkiye û Kurdistanê agirê Cejna Newrozê pêdixin û kesên ku di Cejna Newrozê de jiyana xwe ji dest dane bi bîr tînin.

 

Piştî axaftinan, bi hezaran kesan agirê Newrozê pêxistin. Bi coş û kelecaneke mezin li dora agir kom bûn û bi gotina "Bijî Serok Apo" agir pêxistin. Dema ku agir pêxistin, coşa girseyê zêde bû û bi hezaran kesan bi hev re sirûda "Çerxa Şoreşê" gotin.

 

Pîrozbahiya Newrozê bi stranan bi dawî bû.