Rabîa Onver-Pelşîn Çetînkaya

 

AMED - Binpaykerdişê heqê merdiman Zîndanê Cinîyan ê Bunyanî de zêde benê, bi taybetî vernîgirewtişê caardişê ziwanê kurdkî. Dayîka tepişteya bi name Gulistan Al, Emîne Al va: “Wextê kênaya mi bi telefon ma dir qisey kerd va ke qiseykerdişê bi kurdkî qedexe yo. Ma nê yewî qebûl nêkenê. Ganî nêheqîyê ke tutanê ma rê yenê kerdiş peynî bibê.”

 

Yew binpaykerdişê heqê merdiman Zîndanê Bunyanî de qedexekerdişê reyna yê ziwanê kurdkî yo. Serra 2024ine ra nata, zîndan weşanê bi kurdkî û xoresnayîşê tepişteyan ê xeberanê kurdkî qedexe keno. Her wina wexto tepişteyî keyeyê xo dir telefon de bi kurdkî qisey kenê, qiseykerdişê înan yenê birnayîş û ceza înan rê yena birnayîş.

 

Dayîka Gulistan Al ke Zîndanê Cinîyan ê Bunyan ê Kayserî de tepişte ya Emîne Al, derheqê binpaykerdişê heqê merdiman ê ke tepişteyê sîyasî ciwîyenê qisey kerd.

 

Emîne Al dîyar kerd ke kênaya aye Gulistan Al 9 serran o zîndanî de ya û va ke Gulistane zîndan de rastê xeylêk binpaykerdişê heqê merdiman ameya. Emîne Al va: “Gulistane rê cezaya muebbetî girankerde ameya birnayîş. Çend dewayê bînî zî est ê ke ceza înan ra zî ameya birnayîş, labelê ma nêzanê ke kam dewa yê û çend serrî ceza ameya birnayîş. Şert û mercê zîndanê Kayseriyê zî xirab ê, sey heme cayî. Hewadarî çin o, tepişteyî hucreyê yew kesî de yenê tepiştiş. 11 tepişteyê cinî est ê, heme hucreyê cîya de yenê tepiştiş. Ey tenya bi vengdayîşê yewbînan dayîşûgirewtişî yewbînan dir danê ro. Sewbîna dayîşûgirewtişê înan çin o. Sebebê ke ê hucreyê yew kesî de yenê tepiştiş semedo ke înan cezaya muebbetê girankerde girewtê. Sebebê ke tutê ma hucreyê yew kesî de yenê tepiştiş oyo ke têkilîyê mabêne înan û hevalê înan bêro birnayîş, ke no zî tewirêk bîn ê ceza yo.”

 

‘Ê tenya eşkenê her 15 rojan reyke eşkenê telefon bikerê’

 

Emîne Al dîyar kerd ke kênaya aye ke cezaya muebbetê girankerde girewta tenya her 15 rojan reyke eşkena telefonê keyeyê xo bikero û va ke ê sey keye semedê têkilîyê sînorkerde bi endîşe yê. Emîne Al va: “Televîzyonêk est o, labelê tenya yew kanal est o û ê bi rayîrê nê kanalî agahî gênê; cayê bînî çin o ke agahî bigîrê. Bi pêroyî ganî hewte ra reyke telefon bikerê, labelê aye 15 rojan reyke telefon kena û no tenya rayîr o ke ma agahdarî ci ra bigîrê. Kayserî zaf dûr o. Ma tenya serra hîrê rey eşkenê semedê serdayîşê akerde şêrê. Semedo ke ma şêrê û abigêrê ganî hîrê wesayîtan bivurnê. Tenya ma nê; keyeyê bînî zî cefa ancenê semedo ke serdayîşî semedê înan zî zehmet ê. Tutê ma zere de îşkence vînenê û ma teber de îşkence vînenê. Înan ceza dayî tutanê ma; bi kêmî wa înan nêzdî bikerê ke ma înan bivînê. Bi nê rengî ê ma û tutanê ma rê zilm kenê.”

 

 

‘Ziwanê kurdkî qedexe yo’

 

Emîne Al dîyar kerd ke aye nêzdîyê şeş aşmî yo semedê dûrbîyayîş û rayîrê dergî nêeşkena serdayîşê kênaya xo Gulistan bikero û va: “Kênaya mi her 15 rojan reyke telefon kena û reya peyêne wexto ke telefon kerd va ke qiseykerdişê bi kurdkî Zîndanê Bunyanî yê Kayserî de qedexe bîyo. Zîndan de besê xo îşkence û bêheqî est o û nika bi nê yewî merdiman rayîr ra vejenê. Ma sey keye êdî nê yewî qebûl nêkenê; ganî nêheqîyê ke tutanê ma rê yenê kerdiş peynî bibê. Ganî nê binpaykerdişî hemverê Rayberê ma Abdullah Ocalanî peynî bibê, ke binpaykerdişê hemverê tutanê ma zî peynî bibê. Eger aştîye wazenê wa zîndan ra dest pêbikerê. Ez wezîrê edaletî ra waştiş kena ke vengê keyeyê tepişteyan bieşnawo, fek xapênayîşê ma ra vera bido. Wa fek polîtîkaya tecrîdî ke zîndan de yenê domnayene verabidê.”