SEMSÛR/MÊRSÎN - Li Semsûrê, piştî meşekê ku bi dirûşmeya "Em bi berxwedanê xwe azad dikin, civakek demokratîk ava dikin" hate lidarxistin, daxuyaniyek li ser berdewamiya têkoşîna jinan hate dayin. Li Mersînê jî, peyama ku hate dayîn ew bû ku hêza kolektîf a jinên berxwedêr li dijî tariyê radiweste.

 

Di 8'ê Adarê, Roja Jinan a Cîhanê de, jin careke din daketin kolanan da ku daxwazên xwe yên ji bo jiyan û mafên xwe bînin ziman.

 

Semsûr 

 

Platforma Jinên Semsûrê di 8'ê Adarê, Roja Jinên Cîhanê de, bi dirûşmeya "Em bi berxwedanê xwe azad dikin, civatek demokratîk ava dikin" meşek li dar xist. Di meşê de, ku ji Parka Koşu heta Qada Newrozê dewam kir, jinan pir caran li erbanê xistin û bi dirûşmeya "Jin, jiyan, azadî" meşiyan. Meşvanan pankartek bi nivîsa "Ger kevirên Mezopotamyayê bikaribana biaxivin, ew ê çîrokên jinên herî berxwedêr vebêjin" û her wiha dowizên bi nivîsa "Bijî 8'ê Adarê", "Em bûn, em hene, em ê hebin", "Ked, wekhevî, azadî, aştî divê bi bandor were bicîhanîn", "Jin, jiyan, azadî", "Bijî yekîtî", "Bijî aştî", "Ked, wekhevî, azadî, aştî" û "Ger jin azad bin, civak azad e" hilgirtin.

 

'Em ê teslîmî tariyê nebin'

 

Piştî meşê, rêvebera FERAT-DER'ê Yeşim Akgul li ser navê platformê daxuyaniyek çapemeniyê xwend. Yeşim Akgul bal kişand ser îstismara jinan a di hemû qadên jiyanê de û got, "Em dizanin ku hemû polîtîkayên zext û tundûtûjiyê yên li dijî têkoşîna jinan ne demkî ne, lê stratejîk û sîstematîk in. Em ê teslîmî tariyê nebin."

 

'Em ê di avakirina civakek demokratîk de roleke çalak bilîzin'

 

Piştî vê yekê, endama Koordînasyona Jinan a Navendî ya Partiya Wekhevî û Demokrasiyê ya Gelan (DEM Partî) Îdîl Ugurlu, destnîşan kir ku jin di her aliyê jiyanê de rastî îstismar û tundûtûjiyê tên û banga Rêberê Gelê Kurd Abdullah Ocalan a ji bo 27'ê Sibata 2025'an ji her kesî re bi bîr xist. Îdîl Ugurlu got, "Em jin dê di avakirina civakek demokratîk de roleke çalak bilîzin. Ji ber ku em naxwazin jiyana xwe winda bikin. Em azadî, edalet, wekheviyê dixwazin. Em dixwazin em bi azadî bijîn. Em naxwazin jin ji aliyê mêran ve, xizmên xwe, an jî biyaniyan ve werin kuştin. Em naxwazin jin ji ber cilên xwe werin kuştin."

 

Daxuyanî bi dirûşmeya "Jin, jiyan, azadî" û govendê bi dawî bû.

 

Mersîn

 

Rêxistina bajarê Mersînê ya Partiya Kedê (EMEP) bi boneya 8'ê Adarê Roja Jinên Cîhanê li Parka Ozgur Çocuk a navçeya Akdenîzê daxuyaniyek da. Di dema daxuyaniyê de pankartek bi nivîsa "Hêza me li dijî tundî, xizanî û şer yekîtiya me ye" hate daliqandin û daxuyaniya çapemeniyê ji hêla endama EMEP'ê Seher Peşmer ve hate xwendin.

 

Seher Peşmer diyar kir ku xizanî, bêkarî, kuştina jinan, sûcên li dijî zarokan, qumar, tiryak, îstismar, şer, komkujî, jenosîd û wêrankirin - ku hemî li çaraliyê cîhanê belav dibin - ji heman çavkaniyê ne. Seher Peşmer got, "Em ê bi têkoşîna hevbeş çareseriyek li dijî vê pergalê ava bikin. 8'ê Adarê ne tenê rojek li welatê me ye, lê rojek e ku hêza hevpar a jinan a li çaraliyê cîhanê li dijî heman zilmê li ber xwe dide nîşan dide."

 

Daxuyanî bi dirûşmeya "Jin, Jiyan, Azadî" bi dawî bû.