AMED - Bi boneya 8ê Adarê Roja Jinên Cîhanî, hevşaredarên Peyasê û Bajarê Nû yên Amedê, ligel rêxistinên jinan û bi dirûşma “Em bi berxwedanê azad dibin, civaka demokratîk bi hev re dihonin”, serdana jinên kedkar ên ku li Herêma Pîşesaziyê ya Organîze ya Amedê di kargehên tekstîlê de dixebitin kirin.

 

Hevşaredara Bêrîvan Gulşen Sîncar, hevşaredara Bajarê Nû Safiye Akdag, endamên TJA’yê, Komeleya Jinan a Rozayê û şandeyeke ji meclîsên şaredariyan beşdarî serdanê bûn. Wan roja jinan li jinên kedkar pîroz kirin û di heman demê de li ser wate û girîngiya 8ê Adarê nîqaş kirin.

 

Mercên kar û ked a jinan hatin gotûbêjkirin

 

Di çarçoveya serdanê de, şande bi rêveberiya Herêma Pîşesaziyê ya Organîze re jî hevdîtin pêk anîn. Li ser şert û mercên kar ên karkerên jin, rola ked a jinan di jiyana civakî û aborî de û pirsgirêkên heyî yên li qada pîşesaziyê gotûbêj hatin kirin.

 

Hate destnîşankirin ku jinan di pîşesaziya tekstîlê de hêza aborî ya girîng temsîl dikin û divê mafên wan ên kedê bêne parastin û pêş xistin. Hevşaredaran ragihandin ku ew amade ne bi her awayî piştgiriyê bidin baştirkirina şert û mercên kar, pêkanîna projeyên nû û xurtkirina mafên jinan li qada ked û kar.